EAEko gizarteratzeko eta laneratzeko arreta eta ibilbide integral pertsonalizatuen eredua

Proiektuaren helburua da pertsona kalteberen laneratzea hobetzea, laguntzak pertsonalizatzean eta gizarteratzeko tokiko ekosistemak sortzean oinarritutako ikuspegi baten bidez. Gizarteratzea eta pobreziaren aurkako borroka lehentasuntzat hartuta, ibilbide soziolaboral malguak eta norberaren beharretara egokitutakoak sustatzen dituzten arau- eta metodologia-joerekin bat egiten du.

Azken urteotan, EAEko gizarte-zerbitzuek aurrera egin dute laguntzen pertsonalizazioan, baina oraindik ere baditu zenbait erronka: antolakuntzakoak eta gizarte-politikak eta enplegu-politikak koordinatzekoak. Proiektuak oztopo horiek gainditu nahi ditu, eredu esperimental baten bidez: "zerbitzuen katalogoaren" ikuspegi tradizionalaren ordez pertsonarengan oinarritutako estrategia bat erabiliz, laguntza-maila desberdinak integratuta, egoera partikular bakoitzaren arabera.

Horretarako, lau proiektu pilotu garatuko dira hainbat eskualdetan, non ekonomia zirkularrarekin lotutako hiru ibilbide soziolaboral ezarriko diren:

1. Hondakinen logistika eta biltegiratzea (biltegien kudeaketarako eta txartel profesionalak lortzeko prestakuntza barne).

2. Hondakinak tratatzea eta berreskuratzea (produktuak sailkatzeko, konpontzeko eta berregokitzeko trebetasunekin).

3. Berreskuratutako produktuak merkaturatzea (merkataritzan eta denda espezializatuen kudeaketan trebatzea).

Prozesua bost fasetan egituratzen da:

1. Diagnostikoa eta orientazioa: parte-hartzaileak hautatzea, beharrak identifikatzea eta ibilbide pertsonalizatuak diseinatzea.

2. Prestakuntza eta enplegu-esperientziak: gaitasun teknikoak eta zeharkakoak garatzea laneratzeko enpresetan eta erakunde laguntzaileetan.

3. Plataforma digital bat sortzea: kasuak sistematizatzeko, esku-hartzeen jarraipena egiteko eta inplikatutako eragileak koordinatzeko tresna.

4. Erakundeen arteko koordinazioa: jarraipen-batzorde bat ezartzea, funtsezko eragileen parte-hartzearekin.

5. Komunikazioa eta hedapena: emaitzak ikusarazteko eta ereduaren erreplikagarritasuna sustatzeko estrategiak.

Proiektuak hainbat laguntza izango ditu: Lanbideren bulegoena, udalena, eskualdeko garapen-agentziena eta hirugarren sektoreko erakundeena; horrek bermatu egingo du ikuspegia integrala izatea eta lurralde bakoitzeko beharretara egokituta egotea. Gainera, tokiko enpresekiko lotura bultzatuko da, enplegu arrunterako trantsizioa errazteko.

120 parte-hartzaileetatik, gutxienez 80k ibilbide soziolaboralak osatzea espero da, % 60k prestakuntza amaitzea eta % 40k lan-esperientzietan parte-hartzea. Epe luzera, proiektuak eraginkortasun handiagoa izango du, honako hauek lortuko baitira: gizarteratzea eta laneratzea areagotzea, erakundeen zatiketa murriztea eta sektore estrategikoetan aukerak indartzea, hala nola enplegu berdean eta ekonomia zirkularrean.